ریاض: سعودی عرب کے تبوک علاقہ میں واقع حالت عمار بارڈرکراسنگ پر دنیا بھر سے آئے ہوئے حجاج کرام کو الوداع کہا جا رہا ہے۔ یہ الوداعی عمل سعودی حکومت کی جانب سے حاجیوں کی خدمت کے لیے کی جانے والی ہم آہنگ کاوشوں کی عکاسی کرتا ہے، جس کی نگرانی گورنر تبوک شہزادہ فہد بن سلطان خودکر رہے ہیں۔ سعودی پریس ایجنسی کے مطابق، مختلف سرکاری و خدمت انجام دینے والے ادارے پوری پیشہ ورانہ مہارت سے کام کر رہے ہیں تاکہ حجاج کی روانگی کے تمام مراحل خوش اسلوبی سے مکمل ہوں، اور انہیں صحت و رہنمائی سے متعلق تمام سہولیات بہم پہنچائی جا سکیں۔ حج کی روحانی یادیں اپنے ساتھ لے جانے کے علاوہ، ہر حاجی کو خادم حرمین شریفین شاہ سلمان بن عبدالعزیزکی جانب سے قرآن پاک کا تحفہ بھی پیش کیا جا رہا ہے۔
متعدد حجاج کرام نے سعودی عرب کی شاندار انتظامیہ اور خدمات پر اپنے دلی تاثرات کا اظہار کیا۔ مصری حاجی مصطفیٰ علام نے کہا ہم نے اتنی اعلیٰ درجے کی تنظیم و ربط کی توقع نہیں کی تھی۔ ہر مرحلے، استقبال سے لے کر روانگی تک، سب کچھ نہایت شاندار رہا۔ کوثَر محمد، جو مصر سے تعلق رکھتی ہیں، نے کہا ہر شخص شفقت، مسکراہٹ اور بہترین خدمات کے ساتھ پیش آتا رہا۔ اردن کے حاجی محمد ابراہیم عبدالرحمٰن نے کہا ہم نے خودکو اپنے ہی خاندان کے درمیان محسوس کیا۔ مملکت، اس کی حکومت اور عوام کے شکر گزار ہیں جنہوں نے بے مثال مہمان نوازی کی۔ فلسطینی حاجی عیسیٰ عبدالوَہاب نے کہا ایک لمحے کیلئے بھی روانگی کا احساس نہ ہوا، بلکہ یہ محبت اور قدردانی سے بھرپور الوداع تھا۔ یہ الوداعی منظر، سعودی عرب کے حج انتظامات کی کامیابی اور بین الاقوامی مہمانوں کے لیے احترام کا ایک خوبصورت مظہر ہے۔
