لاہور:
لاہور قلندرز کے سی ای او ثمین رانا نے سکندر رضا کی کارکردگی کو سراہتے ہوئے کہا ہے کہ سکندر رضا کا جتنا بھی شکریہ ادا کروں کم ہے۔ ہم کل سارا دن ان کے لیے فلائٹس تلاش کرتے رہے اور اللہ نے ان کی محنت کا صلہ فتح کی صورت میں دیا۔
پی ایس ایل 10 کے فائنل میں فتح کے بعد لاہور قلندرز کے کپتان شاہین شاہ آفریدی اور فرنچائز کے سی ای او ثمین رانا نے پریس کانفرنس میں ٹیم کی کامیابی کا سہرا اجتماعی کوششوں، مضبوط ڈویلپمنٹ پروگرام اور کھلاڑیوں کی پیشہ ورانہ وابستگی کو دیا۔
انہوں نے مزید کہا کہ پی ایس ایل 10 کی ٹرافی ہم شاہین شاہ آفریدی اور حارث رؤف کو ڈیڈیکیٹ کرتے ہیں، جو اس ٹیم کا لازمی حصہ رہے ہیں۔ ثمین رانا نے واضح کیا کہ محمد نعیم کا شاہین شاہ آفریدی سے کوئی خاندانی رشتہ نہیں بلکہ وہ گزشتہ پانچ سال سے پلیئر ڈویلپمنٹ پروگرام کا حصہ رہے ہیں۔
کپتان شاہین شاہ آفریدی نے اپنی گفتگو میں سکندر رضا کی تعریف کرتے ہوئے کہا کہ اللہ کا شکر ادا کرتا ہوں۔ سکندر رضا نے اپنی ہر پرفارمنس سے ثابت کیا کہ وہ دنیا کے بہترین آل راؤنڈرز میں سے ایک ہیں۔
شاہین نے مزید کہا میں بالکل نہیں بدلا، دیکھنے والی آنکھ ہونی چاہیے۔ یہ ٹرافی میں نے نہیں جیتی، یہ لاہور قلندرز کے پلئیر ڈویلپمنٹ پروگرام کی جیت ہے۔
انہوں نے ٹیم کے ماحول کو کامیابی کی کنجی قرار دیتے ہوئے کہا کہ ماحول زبردست رہا اور اس کا کریڈٹ ثمین رانا کو جاتا ہے، اگر ماحول مثبت ہو تو ٹیم ضرور جیتتی ہے۔
سی ای او ثمین رانا نے یہ بھی بتایا کہ شاہین شاہ آفریدی نے حالیہ عرصے میں آرام کے لیے کرکٹ بورڈ سے وقت مانگا تھا اور ایک سال کے دوران قومی کرکٹ کو اس حوالے سے نقصان بھی ہوا۔ انہوں نے زور دیا کہ اگر پاکستان کی کرکٹ کو بہتر بنانا ہے تو ہمیں سب کو مل کر ایک دوسرے کی حمایت کرنا ہوگی۔
