کوئٹہ:
خضدار میں فتنتہ الہندوستان کے بزدلانہ حملے کے خلاف جنوبی بلوچستان کے مختلف اضلاع کی انتظامیہ اور طلبہ و طالبات نے معصوم شہداء سے اظہارِ یکجہتی کیا۔
جنوبی بلوچستان کے مختلف اضلاع کی انتظامیہ اور اسکولوں کے طلبہ و طالبات نے خضدار میں فتنۃ الہندوستان کے سفاکانہ اور بزدلانہ حملے میں شہید ہونے والے معصوم بچوں کی یاد میں شمعیں روشن کیں اور ان کے اہلِ خانہ سے بھرپور اظہارِ یکجہتی کیا۔
اس موقع پر شرکاء نے ہاتھوں میں پلے کارڈز اٹھا رکھے تھے جن پر دہشت گردی کے خلاف نعرے درج تھے اور امن و سلامتی کے عزم کا اظہار کیا گیا تھا۔
شرکاء کا کہنا تھا کہ معصوم بچوں کو دہشت گردی کا نشانہ بنانا سفاکی کی انتہا ہے اور ایسی بزدلانہ کارروائیاں انسانیت کے دامن پر بدنما داغ ہیں۔ دہشت گرد اس معاشرے کا ناسور ہیں جو کسی قسم کی رعایت یا معافی کے مستحق نہیں۔
شرکاء کا مزید کہنا تھا کہ قوم کو متحد ہو کر ان کے خلاف کھڑا ہونا ہوگا تاکہ آئندہ کوئی ہاتھ معصوموں کی طرف اٹھنے کی جسارت نہ کر سکے۔
